DILI - Iha loron Sabadu (22/1), “iklima Partido Democrata (PD)” sasurut nuansa Suku Comoro, Sub Distritu Dom Aleixo, Dili, bainhira Secretario Geral (Secger) PD Eng. Mariano Sabino Asanami fo tomada de posse ba estrutura PD foun iha Aldeia 15, area Suku Comoro.
Militantes PD Suku Comoro, hatudu antusiasmu maka’as. Hotu-hotu hakilar PD. Sira hotu respeita Secger PD Eng. Mariano Sabino Asanami nudar “liurai”. Hatur nia iha kadeira depois hulan lori ba fatin serimonia. Militantes PD deskripta katak, sira hakarak PD tenke sai buras hanesan modo “kangko”. Sira hakarak ‘kangko PD’ buras dolar hanesan kangko ba area Suku Comoro, kumesa Aldeia Beto ba to’o area Kampung Marinir. Sira fo deskripsaun hanesan nee, tamba sira kuda kangko barak iha sira nia hela fatin no sempre lori ba fa’an Mercado Comoro, iha dalan ninin, no Mercado Hali Laran, Lahane. “Mai ita halo PD sai hanesan kangko nebe ita kuda no fa’an iha mercado. Mai ita hamutuk halo PD sai buras liutan,” militantes PD hakilar.
Seremonia hametin estrutura PD nivel suku no aldeia nee mos, familia boot PD, hetan rahun diak. Sira simu kontenti militante atus resin husi Partido Fretilin, Partido Republica no PSD. Husi afaliasaun militante partido tolu nee, balu hetan kedas vantajen diak tamba ba estrutura foun. Prujemplu hanesan Filomeno da Cruz no Joao Mau Kiak (husi Partido Fretilin), no Junior da Costa (husi Partido Republica). Iha sira nia deklarasaun politika, sira reforsa katak, sira afalia ba PD la bazea ba presaun husi partido balu maibe sira nia hakarak rasik. Antes halo adaliasaun, sira harohan uluk ba Maromak, rai lulik no matebian sira, para loke dalan luan ba sira hodi tama PD. Sira nia harohan Maromak hatan duni.
Joao Mau Kiak reforsa, “Hau nia grupu sai husi Partido Fretilin bazea liuba ami nia konsensia moral, konsensia politika, no responsabilidade tomak. I ohin, Sabadu (22/1), ami halo deklarasaun politika iha PD. Nai Maromak, matebian no Rai Lulik hotu mak sai sasin ba ami nia deklarasaun nee”.
Iha tempu hanesan, Prezidente PD Distritu Dili Alberto Henrique Maria hato’o bem vindo ba militantes foun sira. “Ita boot sira hili PD laos dalan sala. Hau husu ita boot sira, mai ita hamutuk kaer metin PD iha futuru. Liliu hodi hasoru Eleisaun Geral 2012. Hau fiar katak, ita boot sira mai hamutuk ho ami, maka PD sei buras liutan. Sei aumenta kadeira iha Parlamentu Nasional,” hatete Aberto.
Ba objetivu ida nee, Secger PD Eng. Mariano Sabino Assanami husu militantes PD hotu-hotu tenke luta ba PD para hodi manan Eleisaun Geral tinan oin. Hotu-hotu tenke respeita no fo kbit ba estrutura foun para bele avansa ba eleisaun ho diak.
Vice Prezidente PD Adriano do Nacimento sublinha tan. “Hau espera, maluk militantes hotu-hotu persiza fihir PD nudar Uma Ida nebe mahon ita hotu. Mai ita hamutuk hodi tane ita nia nasaun no povu, liu husi ita nia kontribuisaun politika nebe PD determina ona”.
Nia hatete, desizaun politika PD nian mak tenki tane no hametin valor ukun-an. Tenke fo valor maka’as ba maluk sira nebe mate ona tamba luta ba ukun-an. Mesmu sira hotu la akompanha ona ukun-an, maibe ita nebe sei moris no goza ukun-an nee, ita tenke kontinua nafatin sira nia luta. “Uluk, sira luta ho terus no susar. Entrega sira nia vida tomak ba ukun-an. Agora ita kontinua nafatin buat nebe sira halo ba rai ida nee. Sira nia luta ita nia kabas, ita lori nafatin ba oin hodi dezenvolve ita nia rain,” hatete Adriano do Nacimento.
Tamba neduni, katak Secger PD Mariano, ema nebe sai husi ASDT, Fretilin, ka PSD, mai iha PD, ita konsidera hanesan ema nebe iha konsistensia maka’as. Hakarak tane duni nasaun demokratiku. Hakarak hahi duni valor demokratiku, hakarak haburas valor demokratiku no valor ukun-an. “Nudar partido, PD tenke defende valores solidaridade, direitus humanus, no demokrasia. Demokrasia nee povu hotu-hotu nian,” nia reforsa. gus
Foti husi: STL, 26 Janeiru 2011
