Representante Partidu Politiku (Parpol) iha Ainaro fo apoiu ba kandidatu Presidente Republika Fernando La Sama de Araujo tamba konsidera La Sama lider jerasaun foun ne’ebe hamrik lori unidade nasional.
Iha Distritu Ainaro, sabado (28/01/2012), bainhira forma equipa susesu ba kandidatura Presidente Republika Fernando La Sama de Araujo, hetan partisipantes hosi partidus seluk hanesan ASDT, PSD, PPT no UNDERTIM. No iha oportunidade ne’e reprezentantes partidu sira ne’e afirma sira nia pozisaun hodi fo apoio ba kandidatu La Sama (hare Jornal Nacional Diário, edisaun Segunda-feira, 30.01.2012, pajs. 1 e 15)!
PSD, Presidente Distritu Ainaro
Presidente PSD Distritu Ainaro, Tarciso haktuir katak, ”PSD fó apoio tomak ba La Sama hodi manan iha eleisaun Presidensial”. Haktuir tan Tarciso, ”PSD laos fó apoio deit ba La Sama iha distritu Ainaro, maibe PSD distritu seluk mos sei fo votus ba La Sama nudar figura potensial”. Tenik tan Tarciso, ”dezisaun fó apoio ba La Sama ne’e ami hamutuk ho katuas deputadu Tara e inklui colega sira barak maka desidi hodi fó apoio ba La Sama, ne’ebe ami ne’ebe fó apoio ba La Sama hosi Distritus, hanesan: PSD Bobonaro (Maliana), PSD Distritu Maun Fahe (Same), PSD Distritu Kova Lima (Suai), ami foti dezisaun katak, saida maka akontese mos ami simu, tamba ami nia konsciensia mora no iha responsabilidade ba ami nia militante iha Distritus atu fó apoio ba La Sama”, tenik Tarciso (idem).
PPT, Agapito Fatima Martins
”Ami nia Presidente Avo Jacob Xavier mos fó orientasaun baa ami hotu iha Distritus 13 katak, ami nia kandidatu maka La Sama, ne’eduni ami sei fó apoio tomak ba La Sama iha eleisaun Presidensial mai ne’e hodi compete ho se se deit para manan”, defende Agapito Fatima Martins (idem).
UNDERTIM, Kordenador Filomeno Martins
“UNDERTIM Ainaro sei fó apoio ba La Sama tamba La Sama Ainaro nia oan no mos ba Timor tomak nia oan, tamba nia lider ida ke diak hakuak ema hotu (idem)”.