DILI – Kongresista hamutuk rihun 7 husi distritu 13 tolu, konsentra iha Kapital Dili, Kinta (01/12) hodi partisipa kongresu nasional Partidu Demokratiku (PD) nian ba dala rua. Ho numeru boot kongresista nee, Prezidente PD, Fernando La Sama de Araujo, hateten, susar atu fo han kongresista sira.
Tuir La Sama, antes nee iha kalkulasaun katak, kongresista sira kuaze rihun haat deit husi distritu mai hamutuk ho nasio nal, too rihun lima deit. Maibe agora, afinal barak liu fali too rihun hitu mak partisipa iha abertura kongresu daruak nee. Tamba barak liu kalkulasaun, entaun susar atu fo han kongresista sira.
“Ami agora atu fo han mos araska uitoan, agora kongresista sira 7 mil mak mai husi distritu 13. Hanesan partidu politiku, ami agradese tamba ema barak liu tan, diak liu tan maibe atu fo han no fo hemu mak araska uitoan,” dehan La Sama ba STL, Kinta (01/12) iha Jinaziu-Dili.
Nia hatutan, lista kandidatura foun ba Prezidente Partidu no Sekretariu Jeral aban (ohin, red) mak hahu deskuti depois sei aprezenta pakotes atu hatan ba eleisaun. Kriteria ba kandutatura mak ema nee tenki militante partidu ninian, tenki kleur uitoan iha partidu nomos kongresista lubuk ida tenki asina lista apoiu.
“Figura kandidatura tenki aseita, tenki hadomi ema, hadomi malu, tenki reprezenta Partidu Demokratiku nian,” dehan La Sama.
Entretantu iha ninia diskursu abertura ba kongresu nee, La Sama esplika, kongresu ida nee sei halo revolusaun makaas hodi hili lideransa nebee forte husi baze ba too nasional. Partidu ida nee hori uluk kedas ho nia prinsipiu maka kaer metin ukun rasik aan, hodi harii nasaun husi baze. Tamba nee partidu nee komesa ona kapasita lider sira husi baze, husi aldeia, suku, sub distritu, distritu, too nasional, nunee bele produz lideransa nebee foti desizaun politika ho karakter nasional.
“Durante partidu ida nee moris, hasoru dezafiu barak, ita liu dadauk ona, povu Maubere hakaat liu dadauk, hateke ba oin no fiar aan liu tan katak objetivu ukun rasik aan nian besik dadauk ona, ita hahuu ba primeiru espasu. Iha tinan oin mai, sei hasoru eleisaun rua, eleisaun prezidensial no eleisaun parlamentu nasional. Eleisaun hirak nee nudar festa ida, mai atu hametin diak liu tan demokrasia iha nasaun ida nee. Labele haluha vota ba iha PD, no PD sei manan iha eleisaun rua nee,” La Sama koalia ho fiar aan.
Nunee mos nia husu ba militante sira katak, la kleur tan misaun Nasoens Unidas nian sei remata iha 2012, no instituisaun rua hanesan F-FDTL ho PNTL sei hamriik mesak hodi garante seguransa no estabilidade ba nasaun.
“Tanba nee ita tenke sai modelu, ba pratika demokrasia hakribi violensia, haburas toleransia, no respeita lei. Atu hetan ida maka hahalok no komportamentu militante PD ninian, politika PD ninian tenki sai hanesan naroman no masin iha sosiedade TL nia leet,” hatete La Sama.
Nia mensiona, PD nudar Partidu Domin, Partidu Dame, Partidu Disiplinadu, Partidu Dedikadu, no Partidu Determinante. Ohin loron, Partidu Demokratiku halo istoria foun ida tan, ba dezenvolvementu demokrasia iha nasaun foun ida nee.
Iha fatin hanesan, Prezidente Republika, Jose Ramos Horta nebee partisipa mos iha abertura kongresu nee, iha nia diskursu, rekoinese PD nudar partidu nebee marka istoria foun ba Timor-Leste.
“Ita boot sira nia istoria nee hau fiar ke partidu PD parte ida nebee lejitimu nomos iha abut ida iha rezistensia no bele kontribui ba haklean demokrasia, unidade, estabilidade iha nasaun nee nia laran,” dehan Horta.
Nia husu atu iha eleisaun nebee besik mai, buat hotu tenki sukat didiak, see lae, ema seluk halo interpretasaun oin seluk. Nudar Xefi Estadu no nudar sidadaun, kontete tebes ho diskursu nebee La Sama halo, liu-liu temi liafuan Demoktariku, Dame no Domin.
“Hau kontete tebes ho diskursu nebee Maun Boot La Sama halo, liu-liu temi liafuan Demokratiku, Dame, Domin. Hau hatene lideransa sira partidu hotu-hotu, lideransa sosiedade sivil iha konsiensia ida nebee diak ba ita hotu. Atu sevisu nasaun ba oin no atu hamriik, atu hatun kiak, atu hetan fatin iha mundu nee, fatin ida nebee ho kredibilidade, ita tenki hametin dame, domin, unidade iha nasaun ida nee,” tenik Horta.
Nia haree katak, dalaruma iha baze, demokrasia hanesan tebe bola. Demokrasia multi partidarismu laos hanesan ema tebe bola, mensajen ida nee laos deit ba Partidu PD, maibe ba partidu tomak, dalaruma lider partidu fo mensajen ruma, maibe la too iha baze, entaun sira bele halo buat ruma hafoer partidu nee nia naran.
Iha parte seluk, Primeiru Ministru (PM), Kay Rala Xanana Gusmão maski la partisipa iha segundu kongresu PD nian, iha Jenaziu-Dili, maibe nia hatoo mos mensajen ida, hodi fo parabens ba iha lider partidu PD, no mos ba militante sira tomak.
Kongresu ida nee partisipa husi Prezidente Republika, Jose Ramos Horta, Xefi UNMIT, Ameerah Haq, Xefi Bankada Partidu Fretilin, Aniceto Guterres, ho Vise Prezidente Partidu Fretilin, Arsenio Bano, Reprezentante Partidu CNRT, Bilou Mali, no husi PSD, Eis Maijor Tara. lay/edo/car
STL, 02 Dezembru 2011
Sem comentários:
Enviar um comentário