DILI - Afiliasaun Presidente ASDT, Distritu Dili, Salvador Martins hamutuk ho nia militante hamutuk 12.673 ba iha Partidu Demokratiku (PD), tanba partidu ne’e rasik abandona sira durante tinan rua resin.
Ne’eduni, nia rasik foti desizaun lorin ninia apoiantes sira tama ba iha partidu PD. Ho sira nia votus fo ba iha PD, nia espera katak sei manan maioria iha Distritu Dili.
“Hau tu’ur iha Presidente ASDT Distritu Dili, liu husi kongresu distrital, hanesan ema balun dehan katak illegal, hau sente nia maka illegal karik,” hatete eis Presidente ASDT, Salvador ba STL iha Sede Nularan, Dili, Sabadu (4/2).
Nia reforsa tan katak, nia hili liu husi kongresu ASDT Distrital iha 2008 ho votus hamutuk 51. Iha momentu ne’e kompte ho Jose Armindo ho votus 31, Jose Dos Santos ho votus 27, ikus liu maka Domingos Maria de Jesus ho votus 14.
Hanesan Domingos Maria de Jesus ne’ebe deklara katak, nia maka president ASDT distritu Dili, ida ne’e lalos karik, tanba nia tu’ur iha pozisaun ida ne’e illegal, laliu husi kongresu distrital nian.
“Nia ne’e hau maka bolu atu servisu hamutuk hau, laos nia maka foti nia an ba iha Presidente ASDT Distritu Dili,” hatete Salvador.
Alende ida ne’e eis Presidente ASDT Distritu Dili, Salvador Martins sente haksolok tebes tanba ho nia politika ne’ebe iha, ohin loron lori ninia militante ASDT distritu Dili hodi afelia ba PD, tanba durante ninia partidu rasik nunka konsidera nia ne’ebe eleitu ba iha Presidente ASDT.
“Hau sente katak iha hau nia partidu nia laran mosu deskriminasaun, ho ida ne’e maka ohin loron hau rasik sai hanesan Presidente ASDT iha Distritu Dili, sai abandona kuaze tinan ida ho balun ona, ne’eduni hau buka dalan atu defende hau nia politika ba iha future,” nia haktuir.
Bainhira nia nudar presidente eleitu ba iha Partidu ASDT, abandonadu deit hanesan entaun nia sente katak nia maka sai fali suspeitu ida ba iha Partidu ida ne’e, ne’eduni nia rasik buka dalan seluk maka mai iha PD, “Naran katak hau labele lori partidu ida ne’e ba iha Portugal ou Indonezia ne’e hau sala bo’ot maibe hodi halo dezenvolvementu ba rai doben TL, ida ne’e maka dalan alternative ida ba hau, maka hau mai hamutuk ho Fernando Lasama, ne’eduni hau prondu fo apoiu,” hatete Salvador.
Iha fatin seluk, Konsolidasaun Partidu Asosiasaun Sosial Demokrata Timorense (ASDT) iha Distritu Bobonaro ho Covalima atu bele hametin strutura partidu nian, hodi hasoru eleisaun jeral ba iha Presidensial no mos parlamentar iha tinan ida ne’e.
Tuir Sekretariu Jeral (SekJer) ASDT, Gil Alves liu husi ninia deskursu iha konsolidasaun Partidu ASDT, Iha Bobonaro ho Covalima Sabadu semana liu katak, Partidu ASDT oras ne’e metin liu ona iha baze maske hasoru dezafiu oi-oin.
Ne’eduni liu husi konsolidasaun ida ne’e atu bele hametin diak liu tan strutura iha baze atu oinsa bele hasoru eleisaun jeral iha tinan ida ne;e. tanba agora dadauk iha ema balun tenta hamonu ASDT maka ASDT, maibe espera katak liu husi konsolidasaun ida ne’e bele halo buras liu tan.
Ho konsolidasaun no hametin estrutura ASDT iha Distritu Bobonaro no Covalima, militantes ASDT simu SekJer ASDT, Gil Alves ho nia komitiva ho antusiazmu. No sira husu atu politiku nain sira husi partisu seluk labele halimar lori Partidu ASDT no Avo Xavier nia naran ba interese seluk.
Iha fatin hanesan, Presidente Partidu ASDT, Bobonaro Feliciano Berelaca Maia, liu husi konsolisasaun ida ne’e atu reforsa estrutura hodi hasoru dezafiu ne’ebe mai dadauk ne’e.
Tuir mai, Prezidenti Partidu ASDT, Distritu, Domingos Barreto Leite alias Doser informa mos katak, nia fiar iha Distritu Covalima, ASDT sei buras liu tan no nia la duvida iha eleisaun oin mai ASDT mak manan iha Distritu Covalima.
Iha Distritu Covalima, ne’ebe halao iha Aldeia Lacona, Suku Debos, Sub-Distritu Suai, militantes Partidu PD ne’ebe lidera husi Domingos Barreto Leite alias ‘Doser’ no militantes husi Partidu UNDERTIM lidera husi João Nascimento deklara offisial afialia ba ASDT.
Ho razaun katak militantes PD no UNDERTIM iha Distritu Covalima desidi afialia ba ASDT, tanba sira rekoinese katak ASDT mak sira nia uma lisan ne’ebe sira tau fiar ba hodi lori povu no nasaun ne’e ba moris diak no sai husi ki’ak no mukit nia laran. car
STL, 06 Fevereiru 2012
Sem comentários:
Enviar um comentário