Joven Dili Apoiu La Sama Iha Eleisaun Parlamentar

STL, 25 Maiu 2012

DILI - Grupu Joventudi Hanoin Futuru (JHF), kompostu husi joventudi husi Delta, Bebonuk, Fomento I, no Becora, deklara sira nian apoia ba Fernando La Sama de Araujo (prezidente PD) iha eleisaun Parlamentar, 7 Julhu mai.

“Mate ka moris amo fo apoiu ba Senhor Lasama no vota ba PD iha Eleisaun Parlamentar,” Kodenador Grupu JHF, Joni Soares, hasai deklarasaun politika, iha Ruko Delta, Dili. iha nia deklarasaun politiku hatete katak PD maka nudar dala ida ba sira atu servi nasaun TL, Kinta (24/5).

Joni hatutan, hahu ohin ba oin, foin sae sira sai tama iha partidu PD nian, tanba haree lalaok politiku PD nian durante nee kapaas tebes. Tan nee maske mosu partidu barak, maibe jerasaun foun sira hatene fihir partidu nebe sei lori prosperiedade ba foin sae sira iha futuru. “Nudar jerasaun foun hakarak hamahan an iha grupu ida ne’e hodi kanaliza ami nia aspirasaun politika ba PD, ne’ebe ami haree akomoda duni ba joven sira nia hanoin,” hatete Joni.

Iha fatin hanesan, Vise Sekretariu Jeral PD, Eusebio Guterres hatete joventudi tempu ona atu reafirma aan, PD oras ne’e dadauk nakonu ho joventudi deit, halibur ema foin sae ne’e maka bele halo mudansa ba nasaun no povu nia moris.

Nia reforsa tan, PD nunka hanoin politika foer hasoru povu, PD hanorin politika mos, los no justu, iha partidu balun halimar money politika hodi sosa votus, ne’eduni joventudi sira tenke matan moris neon nain. Bainhira Partidu balun fo ba imi, diak liu simu deit, maibe vota ba PD, tanba PD maka dalan los ba demokrasia.

Eis membru Asembleia Konstituante nee hatutan, atu lori povu ba moris diak, laos ho maneira amiasa no money politik. Tan nee PD lakohi buat hirak nee akontese iha partidu demokratiku, osan povu nian atu halo dezenvolvementu ba rai doben Timor Leste.

“Partidu nebe uza meius money politik hodi sosa votus, PD kontra ida ne’e. Needuni nia husu ba militante no simpatizante PD katak, komesa ohin loron ba oin, atu mobiliza malu hodi vota ba PD.

“Eleisaun besik ona, lalika tan ba iha maun bo’ot ka maun ki’ik, maibe tenke iha prinsipiu ida atu bele termina ita nia futuru ba nasaun, futuru joventudi nian laos futuru maun bo’ot ka alin ki’ik sira nian,” nia hatete.

Iha oportunidade ne’e mos, Sekretariu Jeral PD, Distritu Dili, Nino Pereira hatete, organizasaun grupu joventudi sira rasik deside sira nia politika hodi fo apoiu PD. Grupu ida ne’e hanoin katak sira nia futuru iha sira nia liman rasik, tan nee presiza organiza an hodi fo sai ba iha publiku kona ba sira nia komitmentu politiku ba partidu demokratiku.

“Ami hamutuk ho sira, joven sira mai husi Bairo Delta, Bebonuk, Fumento Delta, no  Becora, sira nia reprezentansaun maka hamutuk iha fatin ida ne’e,” tenik Nino. car