PPT Sei Vota ba PD Iha Eleisaun Parlamentar

DILI - Partidu Povu Timor (PPT), maske lakon direitu konkore ho partidu politiku sira seluk iha eleisaun parlamentar. Maibe sei lakon direitu vota hanesan sidadaun. Tanba militante no simpatizante PPT sei vota ba vitoria Partidu Demokrat (PD) iha eleisaun parlamentar. Prezidente Partidu Povu Timor (PP), Jacob Xavier hatete, PPT nudar partidu sei nafatin ezisti, maibe labele konkore ba iha eleisaun parlamentar, tanba la aprezenta listra kandidatura partidu ba CNE tuir lei haruka. Maibe iha eleisaun parlamentar PPT sei la lakon votus, tanba militante no simpatizante PPT sei vota ba PD. 

“Ami nia partidu nafatin, ami mak la konkore iha eleisaun, maibe ami nia militante no simpatizante sei vota ba PD atu ukun,” hatete Jacob ba STL iha nia rezidensia, Tuana Laran, Segunda (14/5). 

Entretantu Prezidente Comicao Nacional das Eleicoes (CNE), Faustino Cardoso hatete, partidu nebe la aprezenta lista kandidatura, sei lakon direitu hanesan partidu politiku atu konkore ho partidu politiku sira seluk iha eleisaun parlamentar. “Sira labele lori simbolu partidu nian lao hamutuk ho partidu seluk kuandu la hatama lista kandidatura ba Komisaun nasional elisaun (CNE) antes hakat ba kampaine,” hatete Faustino. 

Prezidente CNE nee hatutan, partidu nebe legalizadu iha direitu atu konkore ba eleisaun parlamentar tuir prosedementu nebe iha, nee dever partidu politiku sira nian wainhira harii nudar partidu politiku nebe ho nia obrigasaun atu tuir eleisaun ho maneira aprezenta lista kandidatura. Nunee partidu politiku nebe mak aprezenta lista kondidatura, bele konkore ba eleisaun, maibe partidu nebe mak lahatama lista kandidatura sei la bele tuir eleisaun. 

“Se sira (Parpol red) hakarak tuir partidu seluk, nee nudar individu laos partidu, tanba lei la fo dalan atu lori atributu partidu ida nian ba fo apoiu fali ba partidu seluk, nudar individu bele maibe nudar partidu labele,” tenik Faustino. Iha fatin hanesan Vice Prezidente Partidu Povu de Timor (PPT), Francisco Pinto hatete, iha elisaun parlametar, PPT la hatama lista kandidatura, maibe sei lao hamotuk ho partidu boot balu. 

“Lista kandidatura ami nia la hatama, maibe ami ho diresaun partidu politiku dalaruma sei integra aan ba partidu boot balu,” dehan Francisco. 

Partidu Politiku nebe mak sei konkore iha eleisaun parlamentar hanesan UDT, PR, PDN, PUN, PD, PTD, PSD, FRETI- Mudansa, KHUNTO, CNRT, Fretilin, PDP, ASDT, PST, PDC,PDL, A-PMT, no Undetim, Parpol mak halo Koligasaun antes eleisaun mak hanesan Aliansa Demokratika mai husi Kota no PTT, bloku proklamador kompostu husi PMD no PARENTIL, ikus liu mak koligasaun PLPA no PDRT, enkuantu PPT ho PNT la hatama lista kandidatura. lay (STL, 15.5.2012)