Prezensa Maun Boot Ramos Horta ba PD

Prezidente PD, Fernando La Sama de Araujo iha Palacio Prezidente Aitarak Laran anunsia katak, maun boot Jose Ramos Horta sei lao hamutuk ho PD hasoru eleisaun parlamentar. 

Tantu publiku admira, tansa maun boot Ramos Horta la lao hamutuk ho Partido Fretilin ka Partido ASDT?. Tansa hamutuk fali ho PD?. Ninia razaun politika saida?. Husi fenomena politika ne’ebe matan bele ha’re, tilun bele rona durante asumi kargo Prezidente RDTL, dala barak deklarasaun maun boot Ramos Horta “hakbesik an liu” ba nuansa politika Partido Fretilin. I bainhira bes-besik hakotu iis, Avo Xavi rasik mos hakarak entrega ASDT ba maun boot Ramos Horta atu hadia. Maibe seidauk konsege. Sei prosesu nia laran. 

Besik eleisaun parlamentar, kharismatika politika Xanana Gusmao ho ninia partido CNRT, sae maka’as. Ninia influensia politika domina ba distritu hotu. Entertantu, Partido Fretilin pasca Lu-Olo lakon iha eleisaun prezidensial, ladun hatudu ninia agitasaun politika mak bele balancia ba influensia politika Xanana no CNRT. Ita la hatene loos, tansa euforia politika Partido Fretilin sai slow down hasoru eleisaun parlamentar. 

Agora PD mosu. La Sama anunsia katak, maun boot Ramos Horta sei lao hamutuk ho PD. “Prezidente Horta depois remata nia knar nudar Prezidente Republika, nia sei lao kampainha hamutuk ho hau ba iha fatin barak, distritu no sub distritu. Ami hein katak, povu sei ba vota,” hateten La Sama ba jornalista, Segunda (14/5). 

Prezensa maun boot Ramos Horta ba PD, bazea konkordasaun politika entre La Sama, maun boot Ramos Horta no Prezidente PNT Dr. Abilio Araujo hakarak lao hamutuk ho PD. Mesmu La Sama la dehan, ida nee laos alinsa, ita bele dehan bes-besik hanesan aliansa forca politika ida hasoru eleisaun. 

Sekarik hanesan aliansa ida, ami hakarak garis bawahi katak, ida nee opurtunidade diak ida ba tranzisaun lideransa politika nasional ba figura nurak sira. Figura Ramos Horta no Abilio, iha duni potensia atu fahe matenek, fahe sira nia opiniaun barak ba figura joven sira mak oras nee barak mak aktiva iha PD. Sekarik ninia objectivu halai ba ida nee, ami espera labele hare deit ba eleisaun maibe presiza kontinuasaun. ** 

STL, 16 Maiu 2012