DILI - Prezidente Partidu Demokratiku (PD), Fernando La
Sama de Araujo hateten, iha eleisaun parlamentar 7 Jullu 2012,
Prezidente Jose Ramos Horta, sei lao hamutuk ho PD.
“Prezidente Horta depois remata nia knar nudar Prezidente Republika, nia sei lao kampainha hamutuk ho hau ba iha fatin barak, Distritu no Sub Distritu, ami hein katak povu nee sei ba vota,” hateten La Sama ba jornalista, Segunda (14/05), iha Palacio Prezidente, Aitarak Laran.
Nia informa, PD agora halo preparasaun atu enfrenta eleisaun. Iha eleisaun parlamentar sei lao hamutuk ho Jose Ramos Horta, tanba iha loron hirak liu ba La Sama, PR Jose Ramos, ho Prezidente PNT, Abilio Araujo halo tiha ona konkordansia atu lao hamutuk, laos atu koalia kona ba aliansa maibe koalia kona ba intendementu.
Nia haree katak, Jose Ramos Horta hanesan figura ida, nebee haree ba iha PD ema mesak foinsae. Needuni nia hakarak akompainha joven sira, atu prepara ba iha trazisaun. Tranzisaun 2017, needuni katuas tenke reforma. Nia dehan, PR Horta ho Abilio Araujo apoia makaas iha PD hodi aumenta tan forsa ba iha PD rasik.
Antes nee, PR Horta hateten, bainhira remata nia mandatu nudar Prezidente Republika, nia sei tuun ba iha baze hodi halo politika. “Hau remata tiha hau nia mandatu iha loron 19 Maiu, liu loron rua sei ba iha Aileu hodi mobiliza massa hasoru eleisaun parlamentar,” hateten Horta.
Entretantu Sekretariu Jeral Partidu Demokratika (PD) Distritu Dili, Nino Pereira, informa, agora dadauk ekipa vitoria husi Prezidente Republika, Jose Ramos Horta lao hamutuk ona ho PD.
Agora sira nia ekipa vitoria lao hamutuk ona ho ami, hodi halo konsolidasaun hasoru eleisaun parlamentar oin mai," nia hateten. Tuir Nino Pereira, Distritu Dili maka sei sai barrometer ba iha eleisaun parlamentar. Espera katak PD Dili, sei metin no votus aumenta.
“Hau hanoin partidu hot-hotu, Fretilin, CNRT, PD sei kompete makaas iha Distritu Dili, tanba nee maka iha Dili ami nafatin faan figura La Sama ho Assanami para bele manan konfiansa husi joven no inan aman sira. Ho ida nee maka ami bele oferese kadeira tolu ba iha parlamentu,” nia hateten.
Nia hanoin, atu tama ba iha eleisaun parlamentar, PD kontinua hametin nia estrutura husi aldea ba distritu, nunee mos harii rede labadai para boot nafatin eleitores nebee foun no mos sira laiha partidu atu hamutuk ho PD. car
STL, 15.5.2012
Sem comentários:
Enviar um comentário