Prepara Gerasaun Foun ba Futuru Timor Leste

Editorial STL

Ramos Horta Apoio PD Hakbi'it Jerasaun Foun

Eis Prezidenti da Republika, Dr. Jose Manuel Ramos Horta nofim esplika ba publiku, tansa nia prezenta iha Partido Democraticu (PD) durante kampaine eleisaun parlamentar?. Tansa la ba Partido Fretilin, ASDT, ou CNRT?.

Horta hatan simplis. Ninia prezensa iha PD, nia dehan, laos atu hadau kadera ho objectivu negativu balu. Nia hili apoiu PD, bazea ba enkontru Maubisse I no II. Bazea ba enkontru importante nee, Horta deside ninia misaun uniku: ‘prepara gerasaun foun hodi kaer ukun iha futuru Timor Leste’.

Mesmu desizaun Horta nakonu ho imagen “funu malirin” entre lideransa partidus politikus hodi manan kadera no poder, atitude politika Horta nee hatudu pasu positivu diak ida husi komitmento politiku Maubisse ne’ebe reforsa katak, lideransa tuan sira presiza prepara gerasaun foun hodi kaer ukun iha futuru.

Mapa politika Timor Leste pasca ukun a’an, maioria lideransa gerasaun foun hamutuk iha PD. Bele dehan sira hotu livre husi konflitus politika pasadu entre lideransa tuan sira. Tan nee, PD lori esperasaun boot ida ba lideransa nasional. PD bele sai hanesan “ponte politika” ida hodi hakotu prosesu tempu pasadu ho prosesu politika ukun a’an ba futuru. Bele sai ponte balancia diak ida ba Partido Fretilin no CNRT.

Tinan 10 ukun a’an, ita ha’ree katak, entre lideransa tuan sira hanesan Xanana Gusmao, Mari’e Alkatiri, Horta, Jose Luis Guterres, Mario Viegas Carrascalao, Abilio Araujo, nst, la livre husi konflitus pasadu. Konfronta interesaun politika entre sira sei maka’as mesmu sira rasik lakohi dehan sai.

Tamba pasu politika Horta hodi apoiu ba PD, nudar pasu importante ba futuru nasaun. Ita espera, prezensa Horta bele haburas influensia politika ba misaun politiku uniku hodi aselera transformasaun lideransa tuan ba lideransa gerasaun foun. Pasu politika refere, labele Horta deit mak halao. Ita espera lideransa tuan sira bele banati.

Asuntu importante husi estafeta lideransa nasional husi lider antigu ba gerasaun foun, labele halao deit iha tempo kampaine eleisaun deit. Maibe presiza buka ninia kontiniudu. Nomos, partidus politikus hotu-hotu mos tenki hola parte. Ida-idak partido tenki prepara ninia kader para kompete iha futuru. ** 

STL, 14 Junhu 2012